KSOM shpall grevë nëse nuk mbahet seanca urgjente e Këshillit Social-Ekonomik

Foto: Facebook, KSOM

Konfederata e organizatave sindikale të Maqedonisë (KSOM) kërkon nga Qeveria që urgjentisht të mbahet seanca e Këshillit Social-Ekonomik.

Sipas KSOM-it, arsyeja e kësaj kërkese është gjendja aktuale “e cila është e paqëndrueshme për shkak të kostos jashtëzakonisht të lartë të jetesës”.

Nëse nuk plotësohen kërkesat për seancë urgjente, KSOM njofton se do të mbajë grevë.

Kryetar i Sindikatës së Pavarur të Policisë dhe koordinator kryesor i përgjithshëm i sindikatave të pavarura në Maqedoni Goce Delçev Todev tha se që nga maji i këtij viti numri i qytetarëve që largohen nga vendi është i madh, sidomos nga sektori i policisë, shëndetësisë dhe arsimit.

KSOM vlerëson se pesë për qind e punonjësve të arsimit largohen nga vendi çdo vit.

“I bëjmë thirrje pjesës tjetër të sindikatave në nivel kombëtar që të ulen dhe të marrin një qëndrim të përbashkët. Nëse na bashkohen, ne do të jemi edhe më të fortë si punëtorë. Nëse ata nuk duan të bashkohen me nismën tonë, ne tashmë e kemi marrë një vendim. Do të mbajmë greva dhe protesta, ndërsa për datën do t'ju informojmë më tej”, tha në konferencën e sotme për media, kryetari i KSOM-it Marjan Risteski.

Sipas KSOM-it, qytetarët janë të varfër dhe nuk mund të mbijetojnë sepse çdo gjë është më e shtrenjtë, dhe pagat janë në nivel të njëjtë, ndërsa Qeveria bën shpenzime joproduktive.

Video e ditës