Shpërndarja masive e forcave të policisë për Lojërat Olimpike ka çuar në një reduktim drastik të krimit në zonën e madhe të Parisit, tha sot ministri i Brendshëm francez Gérald Darmanen.

Gjatë një vizite në një stacion policie në periferi të Parisit, Saint-Denis, Darmanen tha se pjesërisht falë pranisë së shtuar të forcave të sigurisë, kishte pasur një rënie të madhe të numrit të shkeljeve javën e kaluar.

Grabitjet kanë rënë me 24 për qind dhe vjedhjet e makinave me 10 për qind që nga fillimi i Lojërave. Kundërvajtjet e dhunshme në transportin publik janë ulur me 40 për qind, raporton DPA.

"Deri më tani, 200 arrestime janë bërë në zonën e madhe të Parisit, me 180 të dyshuar në paraburgim policor," tha ai.

Disa akte të planifikuara dhune me motive të mundshme terroriste janë parandaluar nga shërbimet e inteligjencës, theksoi Darmanen.

“Ne çdo ditë arrestojmë njerëz që besojmë se mund të kryejnë një akt, por nuk ka pasur kërcënim të karakterizuar, asnjë organizatë të jashtme që donte të na sulmonte, tha ai. Arrestimet ishin vetëm të individëve të izoluar – shtoi ai.

Rreth 30.000 policë dhe rreth 10.000 personel ushtarak janë vendosur për të mbrojtur Olimpiadën në zonën e madhe të Parisit.