Kremlini: "Operacioni special ushtarak" do të vazhdojë derisa të kontrollojmë plotësisht Donetsk

Severodonetsk / luftime / Foto: EPA-EFE/ZURAB KURTSIKIDZE

Kremlini tha sot se operacioni ushtarak në Ukrainë duhet të vazhdojë derisa Rusia të marrë kontrollin e plotë të rajonit lindor të Donetskut.

Dmitri Peskov, zëdhënësi i presidentit rus Vladimir Putin, deklaroi se fushata në Ukrainë do të vazhdojë "të paktën deri në çlirimin" e "Republikës Popullore të Donetskut".

Peskov gjithashtu vuri në dukje se Shtetet e Bashkuara janë duke u afruar më shumë për t'u bërë palë në konfliktin në Ukrainë, që, sipas tij, është një zhvillim "jashtëzakonisht i rrezikshëm" i ngjarjeve.

Pala ruse ka qëndrim negativ ndaj deklaratës së Sekretarit të Shtetit të SHBA-së Anthony Blinken për mundësinë e përdorimit të armëve që SHBA i dha Ukrainës kundër territoreve ku u mbajtën referendumet për bashkimin me Rusinë, paralajmëroi ai.

Lidhur me deklaratën e presidentit ukrainas Volodimir Zelenski se "nuk ka asgjë për të diskutuar" me kolegun e tij rus Vladimir Putin nëse Moska njeh "referendumet" në katër rajonet e pushtuara, Peskov theksoi se kjo nuk është "asgjë e re" nga pala ukrainase.

Në lidhje me fushatën për mobilizimin e 300 mijë rezervistëve, mediat ruse raportuan se nga mobilizimi nuk përjashtohen shtetasit rusë, të afërmit e të cilëve janë të angazhuar në mbledhjen e forcave të armatosura të Ukrainës.

Video e ditës