Administrata presidenciale e Rusisë u ka thënë zyrtarëve që të ndalojnë përdorimin e iPhone të Apple për shkak të shqetësimeve se pajisjet mund të jenë të ndjeshme ndaj agjencive të inteligjencës perëndimore, raportoi sot gazeta ruse Kommersant.

Në një seminar të organizuar nga Kremlini për zyrtarët e përfshirë në politikën e brendshme, zëvendës shefi i parë i kabinetit të presidentit rus, Sergey Kiriyenko, u tha zyrtarëve që të ndërronin celularët e tyre deri më 1 prill, raporton Kommersant, duke cituar burime të paidentifikuara.

"Ka marrë fund me iPhone: hidhini ose jepjani fëmijëve," citoi Kommersant një nga pjesëmarrësit në takim të ketë shtuar: "Të gjithë duhet ta bëjnë këtë në mars".

Kremlini mund të japë pajisje të tjera me sisteme të ndryshme operative për të zëvendësuar iPhone, shkruan Kommersant.

Zëdhënësi i Kremlinit Dmitry Peskov tha se ai nuk mund ta konfirmonte raportin, por se telefonat inteligjentë gjithsesi nuk mund të përdoren për qëllime zyrtare.

Presidenti Vladimir Putin ka thënë gjithmonë se ai nuk ka një smartphone, megjithëse Peskov tha se Putin përdor herë pas here internetin.