Pas një udhëtimi gjashtë orësh nga rezidenca e saj verore në Balmoral, arkivoli i Mbretëreshës Elizabeth II mbërriti në kryeqytetin skocez, Edinburg. Rrugës për në qytet, dhjetëra mijëra qytetarë vërshuan rrugët për të parë për herë të fundit mbretëreshën, e cila sundoi mbretërinë e Britanisë për 70 vjet.

Arkivoli ishte i veshur me flamurin mbretëror skocez dhe kurora me lule të zgjedhura nga pasuria Balmoral. Një numër i madh qytetarësh të Edinburgut u mblodhën në qendër për të mirëpritur procesionin, i cili përfshinte vajzën e Mbretëreshës, Princeshën Anne, deri në rrugën për në Pallatin e Holyroodhouse, ku u pritën nga një roje nderi ushtarake. Procesioni më parë kaloi nëpër qytetet skoceze të Aberdeen, Dundee dhe Perth.

Ushtarët mbretërorë të Skocisë, pasi mbërritën, e çuan arkivolin në pallat ku do të qëndrojë gjatë natës. Që nesër, arkivoli do të prehet në Holyroodhouse, rezidencën mbretërore në Edinburg.

Ndryshe, udhëtimi nga Balmoral ishte vetëm i pari në serinë që pason funeralin shtetëror që mbretëresha do të ketë në Westminster të Londrës më 19 shtator.