Deputeti i Kosovës dënohet me tre vjet burg për një vendim të kundërligjshëm nga viti 2019
Deputeti i Kuvendit të Republikës së Kosovës, nga radhët e partisë në pushtet Lëvizja Vetëvendosje (LVV), Jetmire Vrenezi është dënuar sot me tre vjet burg dhe 2.000 euro gjobë, për një vendim të kundërligjshëm që ka marrë në vitin 2019, si udhëheqëse e sektorit urban në komunën e Prizrenit.
Të njëjtin dënim Gjykata Themelore në Prizren ia ka shqiptuar edhe ish-shefit të Inspektoratit Ndërtimor Komunal, Islam Thaçi, ndërsa katër të pandehur të tjerë janë liruar për mungesë provash.
Vrenezi dhe Thaçi, sipas shpjegimit të gjykatës, janë shpallur fajtorë për akuzën e keqpërdorimit të detyrës zyrtare dhe tejkalimit të detyrës, duke marrë vendim të kundërligjshëm për rrënimin e objektit në qendrën tregtare “Abi Bazaar” në Prizren.
Dy zyrtarët e atëhershëm komunal e kanë marrë vendimin e kundërligjshëm me qëllim që të dëmtojnë investitorin “Abi” SHPK, edhe pse ai ka aplikuar në rregull për leje ndërtimi, njofton gjykata.
Palët e pakënaqura kanë të drejtë të ankohen në gjykatën e apelit.