Në aksionin e koordinuar ndërkombëtar të BIA-s, Ministrisë së Punëve të Brendshme të Serbisë, Europolit dhe Eurojust-it, janë sekuestruar mbi 100 kilogramë kokainë me vlerë mbi 10 milionë euro dhe janë arrestuar disa persona në BE dhe Serbi, raportojnë mediat serbe.

Mediat beogradase shkruajnë se droga është sekuestruar në Belgjikë dhe se është arrestuar një grup që bashkëpunonte me klanin kriminal.

Në këtë aksion në Holandë, anëtarët e një grupi të organizuar kriminal, shtetasit serb D.R. (28) dhe D.P. (48), të cilëve iu gjetën armë dhe një sasi e caktuar parash, të cilat dyshohet se janë rezultat i veprave kriminale, ndërsa në Belgjikë dhe Luksemburg janë arrestuar edhe shtetasit serb S.K. (36), G.D. (32), J.V. (33), një person i panjohur, si dhe shtetasi i BeH S.Gj. (42).

Në territorin e Beogradit është arrestuar shtetasi serb V.V. (29), të cilit i është caktuar masa e ndalimit prej 48 orësh, i cili me kallëzim penal do të dërgohet në prokurorinë kompetente.

Droga u sekuestrua në Arlon, në juglindje të Belgjikës, gjatë kontrollit të një magazine. Të dyshuarit kanë tentuar ta fshehin kokainën me pllaka betoni për eksport më të lehtë.

Kërkimet u kryen njëkohësisht në Holandë, Luksemburg dhe Serbi.

"Gjithsej, pothuajse 100 anëtarë të shërbimeve të ndryshme policore u angazhuan në operacionin për të shkatërruar një organizatë kriminale serbe të angazhuar në tregtinë ndërkombëtare të kokainës," tha prokuroria.

Policia vijon punën e koordinuar për zbardhjen e të gjitha rrethanave lidhur me shpërndarjen e lëndës narkotike të përmendur dhe identifikimin e anëtarëve të tjerë të grupit të krimit të organizuar ndërkombëtar të përmendur.