Ministri ukrainas i Mbrojtjes Oleksiy Reznikov njofton se Rusia po përgatit një ofensivë të re të madhe në vendin e tij dhe paralajmëroi se ajo mund të fillojë më 24 shkurt.

Reznikov tha se Moska kishte mobilizuar mijëra trupa në mënyrë që të mund të "provonte diçka" për të shënuar përvjetorin e fillimit të pushtimit në 2022.

Një sulm i tillë do të shënonte edhe Ditën e Mbrojtësit të Atdheut në Rusi, 23 shkurt, që feston ushtrinë.

Radio Evropa e Lirë raporton se Reznikov beson se Moska tani ka mobilizuar rreth 500.000 trupa për ofensivën e re.

Në shtator 2022, presidenti rus Vladimir Putin njoftoi një mobilizim të përgjithshëm prej rreth 300.000 trupash, të cilat ai tha se ishin të nevojshme për të siguruar "integritetin territorial" të vendit.

Reznikov beson se numri aktual i ushtarëve të rekrutuar dhe të dislokuar në Ukrainë mund të jetë shumë më i lartë.

“Zyrtarisht kanë shpallur 300.000 mijë, por kur i shohim ushtarët në kufi, sipas vlerësimeve tona është shumë më tepër”, tha Reznikov.

Pavarësisht luftimeve të ashpra në rajonin lindor të Donbasit, lufta ka qenë në një ngërç në muajt e fundit, veçanërisht pasi Ukraina rifitoi kontrollin e qytetit jugor të Khersonit.

Me përjashtim të pushtimit rus të qytetit Soledar, asnjëra palë nuk bëri ndonjë përparim të madh territorial.