Inkursionet e ukrainasve në rajonin kufitar rus të Kurskut janë pasojë e agresionit të Moskës kundër Ukrainës, tha sot Mykhailo Podoliak, një këshilltar i lartë i administratës në Kiev.

Për tre ditë, Kievi nuk komentoi mbi pretendimet se forcat ukrainase pushtuan territorin rus.

Podoliak as në fjalimin e sotëm nuk konfirmoi se sulmet ishin vepër e ushtrisë së rregullt ukrainase.

"Rusia ka besuar gjithmonë se normat ligjore kufizuese nuk vlejnë për të, dhe për këtë arsye ajo mund të sulmojë territoret e vendeve fqinje pa u ndëshkuar dhe në mënyrë hipokrite të pretendojë paprekshmërinë e territorit të saj," shtoi ai.

Këshilltari deklaroi se edhe lufta ka rregullat e veta, ndaj “agresori në mënyrë të pashmangshme paguan çmimin e veprimeve të tij”.

Forcat ruse po përballen ende me një inkursion të madh nga trupat ukrainase në Kursk, një pengesë e papritur për Kremlinin, ushtria e të cilit ka bërë përparim përgjatë gjithë frontit për disa kohë.

Ushtria ukrainase nisi një ofensivë të martën me 1.000 trupa dhe automjete të blinduara, tha Shtabi i Përgjithshëm rus, duke shtuar se po bënte gjithçka për të larguar trupat ukrainase nga territori i saj.