Forcat paqeruajtëse të NATO-s në Kosovë (KFOR) e kanë cilësuar situatën e sigurisë në vend si të qetë, por jostabile, veçanërisht në pjesën veriore të Kosovës, të banuar kryesisht me serbë, transmeton gazeta “Koha ditore”.

Në një përgjigje me shkrim nga Zyra për Informim e KFOR-it theksohet se NATO kryen patrullime të pavarura në të gjithë Kosovën, përgjatë vijës kufitare, si dhe patrullime të përbashkëta me policinë e Kosovës dhe patrulla të sinkronizuara me forcat e armatosura serbe.

Forcat e NATO-s janë duke patrulluar në pjesë të ndryshme të Kosovës dhe këtë e ka konfirmuar përfaqësuesi i tyre. Në javët e kaluara, njoftime për patrullime janë lëshuar edhe në qytete të tjera jashtë pjesës veriore të Kosovës, thekson gazeta.

Misioni i NATO-s thekson se patrullimet janë dëshmi e përkushtimit të kahershëm dhe të qëndrueshëm të Aleancës për paqe dhe stabilitet në Kosovë dhe në Ballkan.

I pyetur për gjendjen e sigurisë pas paralajmërimeve të qeverisë së Kosovës se do të hapë urën mbi lumin Ibër në qytetin verior të Kosovës, Mitrovicë, KFOR-i thekson se situata është e qetë por jostabile.

Qeveria e Kosovës planifikon të rihapë urën në qytetin e ndarë etnikisht të Mitrovicës, i cili ka qenë i mbyllur për 25 vjet, por shpesh ka qenë burim konflikti midis serbëve në veri dhe shqiptarëve në jug të qytetit.

“Në përgjithësi situata e sigurisë në Kosovë është e qetë, por mbetet e brishtë, sidomos në veri të Kosovës. Ne jemi duke monitoruar nga afër zhvillimet dhe po mbajmë një prani të dukshme dhe konsistente përmes patrullimeve të rregullta dhe angazhimit me komunitetet lokale”, vijon reagimi i misionit.

KFOR-i tregoi se vazhdon të operojë në Kosovë si një element i tretë i reagimit të sigurisë pas Policisë së Kosovës dhe Misionit të BE-së për Sundimin e Ligjit në Kosovë (EULEX).

NATO shton se vazhdon patrullimet dhe kryen misionin e saj sipas Rezolutës 1244 të OKB-së.