Aktori i Hollivudit, Kevin Costner, ka gjetur mbështetje të papritur tek gruaja e tij e parë, Cindy Silva, pasi kaloi një divorc të dhimbshëm nga Christina Baumgartner vitin e kaluar. Sipas një burimi pranë aktorit, Cindy u bë mbështetja e tij në kohë të vështira.

"Kevin dhe Cindy kanë mbetur miq të ngushtë dhe ajo e ka ndihmuar atë të kalojë sa më lehtë dhimbjen emocionale të ndarjes me Christine në muajt e fundit. Ajo është një grua e mençur dhe ai e vlerëson vërtet që ndarja e tyre dikur e trishtuar është kthyer në një miqësi të bukur", ka zbuluar një burim për Daily Mail.

Ish-bashkëshortët, të cilët u takuan në vitin 1975 si studentë në Universitetin Fullerton, u martuan në vitin 1978 dhe u divorcuan pas 16 vitesh martesë. Pavarësisht divorcit, i cili i kushtoi Cindy-t rreth 80 milionë dollarë, ata arritën të ndërtonin një marrëdhënie të shëndetshme, veçanërisht për shkak të tre fëmijëve që kanë së bashku - Lily, Joe dhe Annie.

"Ata mblidhen shpesh, sidomos kur janë ditëlindjet e fëmijëve të tyre dhe kalojnë kohë cilësore së bashku. Gjithçka është shumë miqësore", shtoi burimi.

Disa vite më parë, Kevin Costner nuk kishte veçse lëvdata për ish-gruan e tij:

"Përmes gjithë dhimbjes, Cindy ishte ajo që gjithmonë mendoja se ishte - një zonjë e vërtetë. Unë ende kam dashuri për të."

Ndërsa 70-vjeçarja Costner kohët e fundit është lidhur me disa zonja të famshme, duke përfshirë Jewel, Sharon Stone dhe Jennifer Lopez, Cindy Silva, tashmë 68 vjeç, jeton një jetë të qetë në Santa Barbara me Larry Amin, me të cilin është e martuar për më shumë se 20 vjet.

Pas divorcit dhe jetës së tij të turbullt të dashurisë, Costner mori përgjegjësinë për dështimin e martesës së tij të parë: "Ishte një sërë ngjarjesh të njëkohshme që çuan në të. E di që lëndova disa njerëz sepse nuk pata sukses në martesën time. Rënia e martesës sime ishte gjëja më e vështirë për mua."