Kandidati për kryetar të Tetovës dhe kryetar i Lëvizjes Besa, Bilal Kasami, tha se më shumë fokusohet në zgjedhjet lokale në vend të kalkulimeve për ndryshimet në Qeveri. Ai pret që zgjedhjet lokale të reflektojnë mbi politikat e mëtejshme.

- Jemi të fokusuar në raundin e dytë të zgjedhjeve vendore. Në atë pjesë, tashmë kemi paralajmëruar bashkëpunim me Aleancën për Shqiptarët se do t'i përkrahim kandidatët e tyre në të gjitha komunat ku shkojnë në raundin e dytë, si dhe se do t'i përkrahin kandidatët tanë në Tetovë dhe Zhelino. Prandaj nuk duam të kemi kombinime të tjera për momentin ku të fokusohemi dhe që do të ndikojnë në rezultatin e zgjedhjeve lokale. Për ne në këtë moment më e rëndësishmja është që të jemi në krye të Tetovës dhe komunës së Zhelinës, tha Kasami.

Sipas tij, qeveria ka legjitimitet deri në fund të mandatit.

- Legjitimiteti i kësaj Qeverie është nga viti 2020, nga zgjedhjet parlamentare dhe personalisht vlerësoj që duhet të jetë deri në fund të mandatit, për çdo gjë tjetër, po ashtu thashë që pas zgjedhjeve do të ketë reflektim nga vetë partitë sipas rezultatin e zgjedhjeve lokale. Çdo formatim i Qeverisë nuk do të jetë vetëm me interes lokal. Maqedonia ka partnerë strategjikë si Uashingtoni dhe Brukseli. Kjo duhet të jetë në bashkëpunim të ngushtë me këto qendra, tha Kasami.

Në pyetjen e gazetarëve se a pret mbështetje nga Alternativa, Kasami tha se pret mbështetje nga të gjithë qytetarët, pa dallim partie dhe etnie.

Burimi: MIA