Jugu akuzon Korenë e Veriut se ka lëshuar ujë nga një digë dhe ka shkaktuar përmbytje

përmbytja foto e Koresë së Jugut EPA-EFE/YONHAP JASHTË KOREA E JUGUT

Koreja e Veriut ka lëshuar ujë nga një digë pranë kufirit të saj me Korenë e Jugut, duke e detyruar popullsinë e vendit fqinj të evakuohet për shkak të rritjes së nivelit të ujit në lumin Imjin, thanë sot zyrtarët e Koresë së Jugut.

Niveli i ujit në një urë lumi në rrethin kufitar jugor të Yeoncheon u rrit mbi një metër dje pasdite, duke detyruar njerëzit që jetojnë përgjatë lumit të evakuohen, tha qeveria në Seul.

“Duket se Koreja e Veriut ka lëshuar ujë nga diga e saj Hwangang”, tha një zyrtar në Ministrinë e Unifikimit të Koresë së Jugut, e cila merret me marrëdhëniet midis dy vendeve, raportojnë mediat britanike.

Autoritetet e Koresë së Jugut u dërguan mesazhe paralajmëruese banorëve të këtij rajoni dhe i urdhëruan ata të evakuoheshin në një vend të sigurt.

Nuk dihet ende se sa njerëzve u është dashur të largohen nga shtëpitë e tyre pas lëshimit të dyshuar të ujit dhe raportohet se niveli i ujit tani po zvogëlohet pasi i ka kaluar 1,6 metra, raportojnë mediat britanike.

Koreja e Veriut ka bërë përpjekje për të reduktuar dëmet nga përmbytjet nga shirat e dendur të kohëve të fundit dhe Seuli i ka kërkuar vazhdimisht vendit që të njoftojë përpara se të lëshojë ujin nga diga, pasi lumi rrjedh përmes Yeoncheon, por deri më tani nuk ka pasur përgjigje nga Pheniani. .

Lëshimi i ujit nga diga në vitin 2009 çoi në përmbytje që vranë gjashtë koreano-jugorë, shtuan mediat britanike.

Video e ditës