Kryeministri japonez Fumio Kishida e cilësoi sot si “skandaloze” deklaratën homofobike të një prej sekretarëve të tij, Masayoshi Arai, duke treguar se ai mund të marrë në konsideratë shkarkimin e tij.

Arai u tha gazetarëve dje se ai "as nuk dëshiron të shikojë çifte homoseksuale" dhe se nuk do të donte që çifte të tilla të jetonin në lagjen e tij, raportoi transmetuesi shtetëror japonez NHK.

- Njerëzit do të largohen nga vendi nëse lejojmë martesat homoseksuale, shtoi Arai.

Kishida tha sot se Japonia dëshiron një shoqëri gjithëpërfshirëse dhe njeh diversitetin.

- Komentet e Sekretarit janë krejtësisht në kundërshtim me politikën tonë dhe janë skandaloze, tha kryeministri japonez dhe shtoi se do të marrë masa të rrepta ndaj tij.

Kishida, megjithatë, i tha parlamentit të mërkurën se martesat e të njëjtit seks do të "ndikonin në shoqëri" dhe se ligjvënësit duhet të jenë "jashtëzakonisht të kujdesshëm në shqyrtimin e kësaj çështjeje".

Arai kërkoi falje për gafën e mbrëmshme, duke shtuar se deklarata e tij ishte e papërshtatshme, megjithëse ishte mendimi i tij personal.

Japonia është i vetmi komb në grupin G7, shtatë vendet më të industrializuara, që nuk i njeh bashkimet e të njëjtit seks.

Kushtetuta e Japonisë e vitit 1947 thotë se "martesa bazohet vetëm në pëlqimin e ndërsjellë të të dy gjinive" dhe "me të drejta të barabarta për burrat dhe gratë".