Deputetët e Kongresit Amerikan në seancën e sotme akuzuan CEO të TikTok, Shu Zi Çu, që aplikacioni vë në dispozicion përmbajtje të dëmshme dhe shkakton "shqetësim emocional" tek përdoruesit e rinj.

Deputeti republikan Cathy McMoris Rogers tha në fillim të një seance dëgjimore në Kongres se brenda pak minutash nga hapja e një llogarie të re TikTok, algoritmi i aplikacionit po promovonte përmbajtje vetëdëmtuese, çrregullime të të ngrënit dhe inkurajuar "sfida" të rrezikshme që mund të kërcënonin jetët.

Ligjvënësi demokrat nga Nju Xhersi Frank Pallone tha se përmbajtja e disponueshme për fëmijët në TikTok përkeqëson "stresin emocional" të fëmijëve, ndërsa përfaqësuesi republikan Bob Latta tha se vajza 10-vjeçare u mbyt kur u përpoq të kryente të ashtuquajturën "sfidë e ndërprerjes", të cilën e pa në një video në aplikacion.

Ligjvënësit e pyetën Shu nëse qeveria kineze mund të hyjë në të dhënat e përdoruesve të amerikanëve dhe si parandalon që përmbajtjet e dëmshme të arrijnë përdoruesit e rinj.

CEO i TikTok tha se ndërsa "shumica dërrmuese" e përdoruesve të aplikacionit janë mbi 18 vjeç, kompania ka prezantuar masa për të mbrojtur të rinjtë që e përdorin atë. Ai shtoi se përmbajtje të tilla si sfidat potencialisht të rrezikshme janë të ndaluara në TikTok.

Aplikacioni kohët e fundit prezantoi më shumë mjete për të lejuar kontrollin prindëror mbi përmbajtjen dhe në fillim të këtij muaji kompania njoftoi se po punonte për një veçori që do t'u lejonte prindërve të bllokonin adoleshentët nga shikimi i videove nga aplikacioni që përmbajnë fjalë ose hashtags të caktuar.

Seanca dëgjimore e drejtorit në Kongres erdhi pasi administrata e Joe Biden u përball me presion në rritje nga ligjvënësit për të ndaluar aplikacionin për arsye të sigurisë kombëtare.

Aplikacioni TikTok është në pronësi të kompanisë kineze BiteDance.