
Qeveria izraelite: Marrëveshja e armëpushimit me Hezbollahun nuk po zbatohet mjaft shpejt
Qeveria izraelite ka paralajmëruar se një marrëveshje armëpushimi me grupin ekstremist libanez Hezbollah nuk po zbatohet me shpejtësi të mjaftueshme, me vetëm ditë të mbetura para një afati përfundimtar për tërheqjen e forcave izraelite nga Libani jugor.
Rekomanduar
Izraeli dhe Hezbollahu ranë dakord për një armëpushim të ndërmjetësuar nga SHBA dhe Franca në nëntor, duke i dhënë fund më shumë se një viti konflikti.
Sipas marrëveshjes, forcat izraelite do të tërhiqen nga Libani dhe Hezbollahu nga jugu i vendit brenda 60 ditëve, me afatin që skadon të hënën në mëngjes.
"Ka pasur një zhvillim pozitiv ku ushtria libaneze dhe UNIFIL (forca paqeruajtëse e OKB-së në Libanin jugor) zunë vendin e forcave të Hezbollahut, siç parashikohet në marrëveshje," u tha gazetarëve zëdhënësi i qeverisë izraelite, David Menser.
Ai shtoi se ishte gjithashtu e qartë se lëvizja nuk ishte mjaft e shpejtë, se kishte ende shumë punë për të bërë dhe konfirmoi se Izraeli dëshiron që marrëveshja të vazhdojë.
Siç raporton Reuters, Manser nuk iu përgjigj drejtpërdrejt pyetjes nëse Izraeli ka kërkuar një zgjatje të marrëveshjes dhe nëse forcat izraelite do të qëndrojnë në Liban pas afatit 60-ditor.
Tre diplomatë thanë se forcat izraelite do të jenë ende në disa pjesë të Libanit pas kësaj.
Një burim politik libanez tha se presidenti libanez Joseph Aoun kishte folur me zyrtarë amerikanë dhe francezë për t'i kërkuar Izraelit të përfundojë tërheqjen brenda kornizës kohore të përcaktuar.
Qeveria libaneze u ka thënë ndërmjetësuesve amerikanë se një veprim i tillë do të ndërlikonte dislokimin e ushtrisë libaneze dhe do t'i jepte një goditje përpjekjeve diplomatike dhe atmosferës optimiste në Liban që kur Aoun u zgjodh president më 9 janar.
Deputeti i Hezbollahut, Ali Fayad, njoftoi më 20 janar se i gjithë populli libanez do të hynte në një fazë të re të "kundërshtimit të pushtimit izraelit me të gjitha mjetet e mundshme" nëse Izraeli nuk tërhiqej.
"Ky konfrontim është përgjegjësi e të gjithë libanezëve, qeverisë, ushtrisë, popullit, partive dhe rezistencës," tha Fayad, sipas Agjencisë Kombëtare të Lajmeve të Libanit.
Mediat izraelite raportuan se Izraeli i ka kërkuar Shteteve të Bashkuara edhe 30 ditë shtesë për të tërhequr trupat e saj nga Libani jugor, pasi ushtria libaneze po vendoset ngadalë dhe forcat izraelite janë ende duke gjetur depo armësh të Hezbollahut.
Duke cituar burime të informuara, gazeta Haaretz tha se SHBA dhe Franca po diskutojnë zgjatjen e kërkuar dhe se Franca nuk kundërshton nëse palët e tjera bien dakord.
Megjithatë, Radio Ushtria e Izraelit raportoi se administrata e presidentit amerikan Donald Trump është më pak e prirur për të zgjatur afatin sesa administrata e mëparshme e Joseph Biden dhe po kërkon një tërheqje të plotë deri të dielën.