Kabineti i sigurisë i Izraelit ka miratuar masat për ta bërë më të lehtë mbajtjen e armëve për izraelitët, pas dy sulmeve të veçanta nga palestinezët në Jerusalem këtë javë, raporton BBC, duke shtuar se kabineti i plotë do të shqyrtojë masat e propozuara të dielën.

"Kur civilët kanë armë, ata mund të mbrojnë veten," u tha gazetarëve jashtë një spitali të Jerusalemit ministri kontrovers i Sigurisë Kombëtare i ekstremit të djathtë Itamar Ben-Gvir.

Masat e reja përfshijnë heqjen e të drejtës së qëndrimit dhe sigurimeve shoqërore të familjarëve të sulmuesit.

Kryeministri Benjamin Netanyahu premtoi një përgjigje "të fortë" dhe "të shpejtë" në një takim të kabinetit të sigurisë. “Përgjigja jonë do të jetë e fortë, e shpejtë dhe e saktë”, tha Netanyahu. “Ne nuk duam përshkallëzim, por jemi gati për çdo skenar”.

Propozimet janë në përputhje me ato të aleatëve politikë të ekstremit të djathtë të Netanyahut, të cilët e ndihmuan atë të kthehej në pushtet muajin e kaluar. Ushtria izraelite ka njoftuar se trupa shtesë do të vendosen në Bregun Perëndimor të pushtuar.

Njoftimi erdhi pasi policia izraelite tha se një djalë 13-vjeçar palestinez ishte pas të shtënave në lagjen Silwan të Jeruzalemit të shtunën që plagosi rëndë një baba dhe bir izraelit.

Tensionet janë të larta pasi nëntë palestinezë – militantë dhe civilë – u vranë gjatë një sulmi ushtarak izraelit në Jenin në Bregun Perëndimor të pushtuar të enjten. Kjo u pasua nga një raketë izraelite nga Gaza, të cilës Izraeli iu përgjigj me sulme ajrore.

Që nga fillimi i janarit, 30 palestinezë - militantë dhe civilë - janë vrarë në Bregun Perëndimor. Presidenti palestinez Mahmoud Abbas pezulloi marrëveshjet e bashkëpunimit të sigurisë me Izraelin pas sulmit të së enjtes në Jenin.