Kandidati për kryetar të Komunës së Strugës nga Aleanca e Shqiptarëve dhe Alternativës Idri Istrefi sot në një konferencë për media ka akuzuar kryetarin aktual Ramiz Merko se ka vjedhur miliona euro nga buxheti komunal.

Sipas tij, manipulimi zgjat disa vite, pra nga mandati i dytë i Merkos, përmes një koncesioni për ndriçimin publik me kompaninë “City Light”.

– Bëhet fjalë për zhvatje dhe vjedhje të miliona eurove nga buxheti i qytetarëve të Strugës nga çifti Ramiz Merko – Armen Kadriu. Ky manipulim po vazhdon prej disa vitesh përmes një koncesioni të dyshimtë me shumë shkelje ligjore, të përmbyllur në mandatin e dytë të Ramiz Merkos, mes komunës së Strugës dhe ndërmarrjes private të ndriçimit publik “City Light”. Kjo kompani për mirëmbajtjen e ndriçimit publik merr miliona euro nga Buxheti i Strugës. akuzoi Istrefi.

Paratë që Bashkia i jep kompanisë pretendon se i shkojnë Ramiz Merkos dhe bashkëpunëtorit të tij Armen Kadriu, për të cilat ai ka dorëzuar transaksione bankare.

– Këtë e dëshmojnë dhjetëra transaksionet bankare, që ne kemi siguruar dhe që do t’i dorëzojmë në të gjitha mediat në vend. Të gjitha këto transaksione janë denoncuar në Prokurorinë Publike dhe Policinë Financiare dhe për mospërgjigjen e tyre do të duhet të përgjigjen. ka thënë Istrefi.

Ai ka treguar se miliona euro nga “City Light” janë paguar në llogarinë private të Armen Kadriut dhe familjes së tij dhe në llogarinë e universitetit privat të Merkos.

– Këto transaksione dëshmojnë më së miri lidhjen e klanit Merko-Kadriu me kompaninë “City Light”, si dhe vjedhjen që na ndodh çdo ditë. Për ta bërë skandalin edhe më të madh, Qeveria e Maqedonisë së Veriut gjatë këtij mandati pagoi 50 për qind të borxheve të komunave. Komuna e Strugës u shpërblye me mbi 2 milionë euro dhe Ramiz Merko zgjodhi “City Light” mes dhjetëra kompanive për të paguar papritur mbi 1,2 milionë euro nga ato mjete. thekson Istrefi.

Merko, siç tha, duhet të mbajë përgjegjësi për krimin para qytetarëve të komunës së Strugës, duke theksuar se nëse e fiton besimin e struganëve do të bëjë auditim të plotë në komunë.

- Të gjitha keqpërdorimet do të zbulohen, dhe autorët do të përgjigjen për çdo qindarkë të shpenzuar kot nga Buxheti i Strugës. nënvizoi Istrefi.

Burimi: MIA