Garda Revolucionare e Iranit ka arrestuar diplomatë të huaj me akuza për spiunazh, njoftoi agjencia iraniane e lajmeve Fars dhe televizioni shtetëror.

Shërbimi i inteligjencës i Gardës Revolucionare ka identifikuar dhe arrestuar diplomatë nga ambasadat e huaja që po spiunonin në Iran, raportoi Fars.

Ndërsa sipas televizionit shtetëror iranian, njëri prej të arrestuarve është një britanik, i cili më pas u dëbua nga vendi.

Zëvendës ambasadori britanik Giles Whittaker dhe diplomatë të tjerë thuhet se morën mostra dheu në zonat e ndaluara ushtarake ndërsa Garda Revolucionare po kryente teste raketash balistike.

Ministria e Jashtme Britanike nuk ka komentuar ende akuzat iraniane.

Mediat iraniane nuk thanë se kur dhe sa diplomatë u arrestuan apo nëse të gjithë u dëbuan.