Çështja e fillimit të hakmarrjes iraniane kundër Izraelit për vrasjen e liderit të Hamasit Ismail Haniyeh në Teheran është vetëm çështje kohe. Të paktën kështu pohojnë burimet amerikane, të cilët paralajmëruan Tel Avivin që të përgatitej për një skenar të tillë.

Iranianët thonë se nuk do të përshkallëzojnë tensionet në rajonin e Lindjes së Mesme, por ata gjithashtu thonë se Izraeli duhet të ndëshkohet për të parandaluar paqëndrueshmëri të mëtejshme. Sipas zëdhënësit të Ministrisë së Punëve të Jashtme iraniane, Nasser Kanani, Irani po përpiqet të vendosë stabilitet në rajon, por kjo mund të arrihet “vetëm duke ndëshkuar” agresorin – Izraelin, ndaj dhe përgjigja e Teheranit është e pashmangshme.

Mbështetja e SHBA për Izraelin, i vetmi frenues në hakmarrjen e Teheranit

Zëdhënësi i bëri thirrje SHBA-së të ndalojë mbështetjen e Izraelit, duke deklaruar se komuniteti ndërkombëtar ka dështuar në detyrën e tij për të ruajtur stabilitetin në rajonin e Lindjes së Mesme dhe për këtë arsye duhet të mbështesë ndëshkimin e "agresorit". Komandanti i Korpusit të Gardës Revolucionare iraniane, Hossein Salami, përsëriti dje kërcënimin se Izraeli "do të ndëshkohet në kohën e duhur".

Sekretari amerikan i Shtetit, Anthony Blinken, u ka thënë kolegëve të tij nga vendet anëtare të G7 se Uashingtoni beson se sulmi i Iranit ndaj Izraelit mund të fillojë shumë shpejt, raporton portali amerikan “Axios”, duke cituar burime të mirëinformuara. Blinken foli me homologët e tij të G7 në mes të përpjekjeve të SHBA për të ulur tensionet në rajonin e Lindjes së Mesme dhe për të parandaluar shpërthimin e një konflikti më të gjerë.

Meqë SHBA-të besojnë se një sulm iranian ndaj Izraelit është i pashmangshëm pas vrasjeve të zyrtarëve të lartë nga grupi militant libanez Hezbollah dhe grupi militant palestinez Hamas javën e kaluar, Blinken u tha zyrtarëve të G7 në një bisedë telefonike se presioni ndaj Teheranit për të kufizuar sulmin është mënyra më e mirë për të shmangur një luftë rajonale.

Izraeli është gati të mbrohet

Izraeli po përgatitet për një sulm të mundshëm shumë-ditor nga Irani dhe aleati i tij, tha një zyrtar izraelit i paidentifikuar. Ai i tha NBC News se Izraeli ka frikë se "valët" e raketave dhe dronëve mund të lëshohen gjatë ditëve të ardhshme në përgjigje të vrasjes së Haniyeh dhe komandantit të Hezbollahut, Fuad Shukr.

"Ata do të përpiqen të na lodhin," tha zyrtari. Ai shtoi se negociatorët izraelitë ishin në Kajro të shtunën për të vazhduar bisedimet, por u larguan "pa bërë asnjë përparim".

Ministri izraelit i financave Bezalel Smotrich tha se komuniteti ndërkombëtar nuk do të lejojë që dy milionë palestinezë në Rripin e Gazës të vdesin nga uria, megjithëse ai tha se kjo "mund të jetë e justifikuar dhe morale" derisa të lirohen pengjet e mbajtura nga Hamasi. Smotrich tha se Izraeli lejon dërgimin e ndihmave humanitare në Rripin e Gazës, sepse, siç tha ai, "nuk ka zgjidhje" për faktin se komuniteti ndërkombëtar nuk lejon bllokimin e ndihmave humanitare për Gazën, raporton "Times of Izraeli”, transmeton Politika.