Irani zbuloi dronin e tij me rreze të gjatë Mohajer-10 në një ekspozitë të pajisjeve ushtarake në Rusi.

Shtetet e Bashkuara kanë akuzuar Teheranin për furnizimin e Moskës me dronë, përfshirë modelin e mëparshëm Mohajer-6, të cilin Uashingtoni thotë se forcat ruse e përdorën në pushtimin e Ukrainës. Irani i mohon këto akuza.

Agjencia shtetërore e lajmeve iraniane IRNA tha se sistemi më i avancuar u zbulua në Forumin Teknik Ushtarak Ndërkombëtar të Ushtrisë 2024. Aktiviteti treditor u hap sot në qendrën e konventave dhe ekspozitave "Patriot" pranë kryeqytetit rus.

Mohajer-10 u zbulua ndërsa Lindja e Mesme përgatitet për një sulm hakmarrës, Irani e ka kërcënuar Izraelin lidhur me vrasjen e liderit të krahut politik të Hamasit, Ismail Haniyeh, më 31 korrik në Teheran.

Irani publikoi detajet e dronit të ri gushtin e kaluar. Më pas u theksua se Mohajer-10 ka një rreze operative prej 2.000 kilometrash, një kohëzgjatje fluturimi deri në 24 orë dhe një ngarkesë deri në 300 kilogramë.

Mediat iraniane publikuan një video të Mohajer-10 dhe armëve të tjera, të shoqëruar me tekstin "përgatitni vendet tuaja të fshehta" të shkruar në hebraisht dhe persisht.