Komuna e Aerodromit njofton se gjatë javës së kaluar kanë kryer inspektime në rreth 100 objekte hoteliere në territorin e komunës, ndërsa nga e hëna do të fillojnë kontrollet e hidranteve në objektet e banimit.

- Është në proces përpunimi i të dhënave të mbledhura nga terreni dhe po përgatitet analiza për statusin e respektimit të dispozitave ligjore dhe gatishmërinë e objekteve për kryerjen e aktiviteteve hotelierike - thonë nga Komuna.

Ata njoftuan gjithashtu se është përgatitur plani për kontrollin e rrjeteve hidrante në ndërtesat e banimit, hyrje-daljet në objektet e banimit kolektiv, si dhe njoftuan se nga e hëna, në bashkëpunim me këshillat shtëpiak dhe drejtuesit e objekteve të banimit, do të nisin inspektimet për gjendjen e objekteve.

Komuna e Aerodromit shtoi se më herët, më 18 mars, u.d Kryetari Dejan Miteski ka dërguar kërkesë deri te të gjitha shkollat ​​fillore dhe çerdhet, duke kërkuar që sa më shpejt të përgjigjen për gjendjen e rrjeteve hidrante në objekte, si dhe për azhurnimin e aparateve për fikjen e zjarrit.

Atyre u kërkohet gjithashtu të paraqesin raporte për mbrojtjen nga zjarri, si dhe plane evakuimi.