Lista e produkteve me çmim të garantuar do të zgjerohet dhe do të përfshijë pije joalkoolike, alkoolike, birrën dhe ujin e gazuar, me përjashtim të pijeve energjetike, njoftoi në konferencë për media kryeministri Dimitar Kovaçevski.

Çmimet e tyre do të ulen me 10 për qind dhe data e referencës është 19 shtatori. Gjithashtu do të ketë masa për uljen e detyrimeve të importit për perimet e freskëta, orizin, agrumet (limonët, portokallet dhe mandarinat), si dhe uljen e tarifave doganore për produktet e qumështit me përmbajtje yndyre mbi 10 për qind. Këto vendime do të merren dhe shpallen në ditët në vijim dhe do të vihen në praktikë, shtoi Kovaçevski.

"Kemi marrë një vendim të ri për uljen e marzhit për pemë dhe perime, kështu që çmimi i këtyre produkteve do të ulet edhe më tej deri në 30 për qind", tha Kovaçevski. Ai shpjegoi se sipas vendimit të fundit të qeverisë, marzhi më i lartë i tregtisë me shumicë do të jetë deri në 10 për qind, ndërsa me pakicë deri në 15 për qind. Çmimi i garantuar do të jetë i vlefshëm deri më 30 nëntor, ndërsa vendimi do të nisë nga e mërkura pasi të jetë botuar në “Fletoren Zyrtare”.

Ai u tha tregtarëve se puna me mjete dixhitale u lejon atyre të ulin shpejt çmimet ashtu siç reagojnë shpejt kur bëhet fjalë për rritjen e çmimeve. Kryeministri përsëriti se qeveria do të arrijë të stabilizojë inflacionin deri në fund të vitit.

- Me rritjen e pagave të shtatorit prej 10 për qind, presim që inflacioni dyshifror të bjerë në 8 për qind, kurse ushqimet në 5 për qind - tha Kovaçevski dhe shtoi se janë në dialog të vazhdueshëm me të gjitha subjektet e interesuara.