Dhe MEPSO si kompani përgjegjëse do të kursejë energji elektrike
Fikja e llambave kur ka ditë të mjaftueshme dhe gjatë periudhës kur askush nuk është në zyrë, fikja e kompjuterëve pas përfundimit të detyrave të punës, ndalimi i përdorimit të pajisjeve shtesë për ngrohjen ose ftohjen e ambienteve dhe printimi vetëm i materialeve të nevojshme. janë disa nga masat që ka marrë përsipër SH.A. MEPSO, ka bërë të ditur drejtori i kompanisë, Orhan Murtezani.
Ai përmes një videoje u ka bërë thirrje institucioneve tjera, por edhe qytetarëve që të kursejnë energjinë elektrike, duke dhënë shembuj konkretë nga SHA MEPSO.
– Si kompani e përgjegjshme duhet të marrim drejtimin me masat e kursimit. Në këto kohë të vështira të krizës energjetike, nëse kërkojmë kursime nga qytetarët, duhet të jemi të parët që ta zbatojmë atë, theksoi Murtezani.
Sipas tij, qytetarët duhet të sigurohen që të parët të kursejnë ata që kërkojnë kursime.
Që nga fillimi i shtatorit për institucionet shtetërore janë në fuqi masat për kursim të energjisë elektrike, me të cilat sipas Qeverisë, konsumi i energjisë elektrike duhet të ulet për 15 për qind në krahasim me periudhën e njëjtë të vitit të kaluar.