Kombet e Bashkuara kanë thënë se situata humanitare në Liban tani është më e keqe se në luftën e fundit me Izraelin 18 vjet më parë, raportoi DPA.

"Situata humanitare në Liban ka arritur nivele më serioze sesa në luftën e vitit 2006," tha zyra humanitare e OKB-së në një deklaratë të lëshuar sot.

“Situata është përshkallëzuar sërish ditët e fundit, me ushtrinë izraelite që urdhëroi banorët e Baalbek dhe Nabatia të largoheshin nga këto zona, pak para se të fillonin sulmet ajrore”, shtoi OKB.

Përveç kësaj, shumë spitale janë të mbingarkuar dhe raportojnë një nevojë urgjente për dhuruesit e gjakut për të përballuar fluksin kritik të viktimave.

Sipas të dhënave nga Ministria libaneze e Shëndetësisë, pothuajse 3.000 njerëz janë vrarë dhe 13.000 janë plagosur që nga fillimi i luftimeve midis Izraelit dhe grupit shiit Hezbollah në Liban. Mes të vrarëve janë rreth 180 të mitur dhe gati 600 gra.

Zyra humanitare e OKB-së tha se më shumë se 11.000 gra shtatzëna janë prekur nga lufta, ku 1.300 prej tyre kanë lindur në një kohë kur sistemi shëndetësor i Libanit është në prag të kolapsit.