Nëse përdorni WhatsApp, të dhënat tuaja mund të jenë në shitje.

Numrat e telefonit të pothuajse 500 milionë përdoruesve të WhatsApp nga baza e të dhënave e përditësuar në vitin 2022 po shiten në forume hakerimi. Kjo do të thotë se pothuajse një e katërta e dy miliardë përdoruesve aktivë të "WhatsApp" janë në rrezik.

Disa burime, shkruajnë mediat e huaja të teknologjisë, pohojnë se ky është informacion i konfirmuar dhe nëse është i vërtetë, mund të jetë një nga rrjedhjet më të mëdha të të dhënave ndonjëherë.

Baza e të dhënave për shitje përmban numra celularë të përdoruesve të WhatsApp nga 84 vende, duke përfshirë SHBA, MB, Egjipt, Itali, Arabinë Saudite dhe madje edhe Indi. Sipas të dhënave të publikuara, ai përmban më shumë se 32 milionë numra amerikanë, 45 milionë nga Egjipti, 35 milionë nga Italia, 29 milionë nga Arabia Saudite, 20 milionë nga Franca dhe 20 milionë nga Turqia. Baza e të dhënave thuhet se përmban rreth 10 milionë numra telefoni rusë.

Përdoruesit e WhatsApp këshillohen të përmbahen nga telefonatat dhe mesazhet nga numra të panjohur.

Hakerët shesin të dhëna: 7.000 dollarë për të dhënat amerikane, 2.500 dollarë për të dhënat britanike

TechRadar shkruan se kanë kontaktuar Meta për të konfirmuar vërtetësinë e pretendimeve dhe për komente shtesë. Deri tani nuk kanë përgjigje.