Në Greqi janë konfirmuar gjithsej 50 raste të lisë së majmunëve, dy më shumë se javën e kaluar, thuhet në raportin javor të Organizatës Kombëtare të Shëndetësisë Publike (EODI), njoftoi korrespondenti i MIA-s nga Athina.

Rastet e konfirmuara janë meshkuj nga 19 deri në 59 vjeç, pra mosha mesatare është 36 vjeç dhe 16 prej të infektuarve (32 për qind) kanë raportuar se kanë udhëtuar jashtë vendit gjatë periudhës së inkubacionit të sëmundjes.

EODI njoftoi se rastet tashmë janë shëruar ose janë duke u rikuperuar në një gjendje përgjithësisht të mirë klinike.

Ai gjithashtu shton se në Evropë, deri më 16 gusht 2022, janë regjistruar 18.960 raste të lisë së majmunëve në 43 vende.

Rasti i parë në Greqi u regjistrua në fillim të qershorit.

Siç njoftoi dje MPB-ja, ministri i Shëndetësisë i Greqisë Thanos Pleuris njoftoi se të martën në vend kanë mbërritur rreth 2300 doza të vaksinës kundër lisë së majmunëve, ndërsa javën e ardhshme Komisioni i Imunizimit do të mbajë mbledhjen për mënyrën dhe kushtet e vaksinimit.

Përveç vaksinave, Greqia po bashkërendon me Komisionin Evropian për prokurimin e 100 terapive.