Gjykata e qytetit në Moskë la sot vendimin për heqjen e licencës së gazetës së pavarur “Novaya Gazeta”, e cila prej vitesh kritikon Kremlinin.

Novaya Gazeta ishte gazeta e pavarur më e njohur e Rusisë derisa autoritetet urdhëruan mbylljen e saj vitin e kaluar si pjesë e një goditjeje ndaj disidentëve.

Gjykata e qytetit të Moskës hodhi poshtë sot ankesën e gazetës kundër një vendimi të shtatorit të Gjykatës së Qarkut të Moskës që i hoqi licencën.

Një gjykatë e qarkut në shtator miratoi një peticion të paraqitur nga rregullatori i medias ruse, i cili akuzoi gazetën për dështimin e dorëzimit të statutit të saj editorial tek autoritetet në kohën e duhur.

Kryeredaktori i gazetës, fituesi i çmimit Nobel për Paqen, Dmitry Muratov, dënoi sot vendimin, duke thënë se ai “i shërben masave që duan që populli të shohë vetëm propagandë”.

Ditë pas fillimit të luftës në Ukrainë, Parlamenti rus miratoi një ligj që ndalon nënçmimin e pretenduar të ushtrisë ruse ose përhapjen e "informacionit të rremë" në lidhje me fushatën ushtarake të vendit në Ukrainë.

Si rezultat i këtij ligji, dhjetëra media të pavarura ruse janë ndaluar, ndërsa disa kanë njoftuar se po pushojnë çdo raportim për Ukrainën.