Një francez i cili u gjobit me 200 euro për të folur në një telefon celular përmes një altoparlanti në një stacion treni në Francë, ka nisur një betejë ligjore kundër gjobës, thonë raportet. BBC.

Ai njihet vetëm si David dhe i tha televizionit francez BFM TV se kishte qenë në telefon me motrën e tij në stacionin e Nantes gjashtë ditë më parë, kur u afrua nga një punonjës i kompanisë franceze të hekurudhave.

Davidi pretendon se i kanë thënë se do të gjobitet me 150 euro nëse nuk e fiket altoparlantin e celularit dhe gjoba sipas tij më pas është rritur në 200 euro për shkak se ka refuzuar të paguajë aty për aty. Ai punësoi një avokat për të kundërshtuar dënimin.

Kompania franceze hekurudhore konfirmoi se burri u ndëshkua nga sigurimi i tyre. Ata deklaruan se personeli i tyre i sigurisë operon në trena dhe stacione dhe është i autorizuar të lëshojë bileta për pasagjerët. Ata po ashtu kanë konfirmuar se gjoba është rritur nga 150 euro në 200 për shkak se pasagjeri nuk ka pranuar të paguajë.

Edhe pse nuk ka ligj në Francë që ndalon të folurit me altoparlantë në vende publike, ka rregulla për kontrollin e zhurmës. Sipas kodit francez të transportit, personat që përdorin pajisje ose instrumente zanore ose prishin qetësinë e të tjerëve me zhurmë në zonat e transportit publik mund të gjobiten.

Sondazhet e opinionit publik tregojnë se të folurit me zë të lartë në publik është një nga sjelljet që konsiderohet më e papranueshme kur bëhet fjalë për telefonatat.

Duke pasur parasysh pikëpamjet kaq të forta, vende të ndryshme kanë qasje të ndryshme për rregullimin e këtij problemi. Në Britani, rregulloret hekurudhore thonë se përdorimi i çdo pajisjeje që prodhon zhurmë dhe shqetëson të tjerët nuk lejohet nëse nuk kanë leje me shkrim dhe shkeljet mund të rezultojnë në gjobë.

Disa operatorë hekurudhor në Britani ofrojnë vagona të qeta ose zona të qeta, ku pasagjerët inkurajohen të mbajnë nivele të ulëta të zhurmës. Për shembull, London North Eastern Railway u kërkon pasagjerëve në vagonë ​​të tillë që të sigurohen që muzika që po dëgjojnë të mos dëgjohet përmes kufjeve të tyre dhe të largohen nëse dëshirojnë të marrin ose të bëjnë telefonata.