Kryetari i Komunës së Kisella Vodës dhe kryetar i BNJVL-së, Orce Gjorgjievski, deklaroi se nëse do të kandidojë për kryetar të Shkupit, pret që të fitojë në raundin e parë dhe se këtë e bazon në mbështetjen që ka nga qytetarët dhe rezultatet që ka arritur deri më tani si kryetar i Komunës së Kisella Vodës.

Gjorgjievski në një intervistë për revistën e përjavshme “Fokus” flet për punën e deritanishme, vizionin e tij për Shkupin dhe mundësinë që të kandidojë për kryetar të kryeqytetit.

-Nëse bëhem kandidat për kryetar të Shkupit, pres të fitoj në raundin e parë. Siç tha kryetari i Qeverisë dhe VMRO-DPMNE-së, në periudhën e ardhshme do të bëhen anketa, në të cilat përveç meje, supozoj se do të përfshihen edhe kryetarët e tjerë të Shkupit nga VMRO-DPMNE, por sigurisht që do të ketë edhe individë të tjerë që do të anketohen. Unë, duke pasur parasysh se jam kryetar i BNJVL-së, ambicien time e kam shprehur para më shumë se një viti. Besoj se kam bërë shumë punë në komunë, se kemi rezultate pas vetes, energji, ekip... Por, mbi të gjitha, kam edhe një koncept se si duhet të duket Shkupi në të ardhmen, si duhet të organizohet qyteti në një kohë relativisht të shkurtër. Mendoj se kjo është mirëpritur edhe nga qytetarët nga të cilët kam marrë mbështetje serioze në periudhën e kaluar. Pra, as në të kaluarën e as tani nuk e kam fshehur ambicien time për të qenë kryetar i Shkupit, theksoi kryetari Gjorgjievski.

Në intervistë, ai e theksoi problemin e transportit publik si një nga më urgjentisht për Shkupin dhe propozoi një zgjidhje konkrete – ndërtimin e një metroje të lehtë, por u ndal edhe në nevojën e një force policore komunale për të përmirësuar higjienën dhe rendin publik në qytet, si dhe planin për ta kthyer Drisllën në një biocentral. Duke folur për nevojën për një sistem stabil energjetik në Shkup, ai paralajmëroi nismë për ndërtimin e termocentralit me gaz, i cili, siç theksoi, do të ishte zgjidhja e duhur.

-Ajo që i mungon qytetit dhe duhet të punohet deri në fund është gazifikimi i Shkupit dhe një termocentral me gaz, i cili duhet të ndërtohet në Shkup dhe sipas meje një nga pozitat më të mira për këtë është “Ohis”. Nëse pushteti i qytetit vepron në mënyrë të organizuar, në bashkëpunim me komunat, të cilat do të veprojnë në kohën e duhur, do të heqin deponitë, do të krijojnë sipërfaqe të gjelbërta dhe do t'i ripyllëzojnë dhe nëse pushteti qendror i bashkohet procesit që mundëson gazifikimin dhe ndërtimin e një termocentrali me gaz, mendoj se ndotja në kryeqytet do të ulet jashtëzakonisht shumë, tha Gjorgjievski.

Ai në intervistë i referohet edhe punës së tij si kryetar i Komunës së Kisella Vodës, duke theksuar se për tre vite ka zbatuar pothuajse plotësisht programin e tij. Përveç konceptit se si duhet të duket Shkupi në të ardhmen dhe si mund të organizohet qyteti për një kohë relativisht të shkurtër, ai foli edhe për gjendjen dhe përkushtimet e BNJVL-së, vetëqeverisjes lokale, organizimin territorial, decentralizimin, projektet që komunat duhet t'i përgatisin dhe t'i aplikojnë me projekte kapitale për thirrjen e dytë për mbështetje financiare nga Qeveria, si dhe tema të tjera që kanë të bëjnë me politikën e brendshme gjyqësore në shtet.