Ministrja gjermane e Mbrojtjes Christine Lambrecht udhëtoi në Ukrainë për herë të parë që nga fillimi i luftës.

Në qytetin port të Odesës në Detin e Zi, ministrja gjermane u prit nga homologu i saj ukrainas Oleksiy Reznikov. Lambrecht ka premtuar të dorëzojë brenda disa ditësh njësinë e parë të sistemit të mbrojtjes ajrore tashmë të premtuar Iris-T SLM.

Pak para vizitës, e cila fillimisht u mbajt e fshehtë për arsye sigurie, dy raketa ruse Iskander goditën një zonë industriale në Odessa, sipas burimeve ukrainase. Askush nuk u lëndua. Pasdite, vetë ministrja është dashur të shkojë në bunker për shkak të një alarmi për sulm ajror, transmeton “Zidejche Zeitung”.

Një vizitë e planifikuar në qytetin e Nikolaev, rreth 40 kilometra nga fronti, u anulua për arsye sigurie për shkak të kërcënimit të një sulmi me raketa dhe artileri rus. Në atë zonë, Lambrecht fillimisht donte të vizitonte vendet e armëve, objektet e trajnimit dhe aktivitetet e çminimit me Reznikov.