Franca planifikon të përdorë një pjesë prej 1,4 miliardë euro, që është interesi për pronat ruse të sekuestruara në BE, për të financuar blerjen e pajisjeve ushtarake për Ukrainën, tha Ministria franceze e Mbrojtjes.

“Së bashku me shtetet e tjera anëtare, Ministria do të marrë pjesë në zbatimin e masës së re për të mbështetur Ukrainën nga Fondi i Paqes i BE-së”, thuhet në njoftim.

Bëhet fjalë për një shumë prej 300 milionë eurosh, e cila do të shpërblehet gjatë vitit 2024. Sipas Ministrisë, këto fonde do të lejojnë rritjen e ritmit të punës së industrisë franceze, e cila do të punojë për të mbështetur Ukrainën.

Komisioni Evropian ra dakord me Drejtorinë e Përgjithshme të Armatimeve që t'i përdorë këto para për blerjen e shpejtë të municioneve, artilerisë dhe pajisjeve të mbrojtjes ajrore për forcat e armatosura të Ukrainës nga industria franceze.

Rreth 200 miliardë euro të aseteve ruse u ngrinë në BE pas pushtimit rus të Ukrainës në shkurt 2022, pothuajse 90 për qind e të cilave ndodhen në Belgjikë.

Në maj të këtij viti, anëtarët e Bashkimit Evropian arritën një marrëveshje për përdorimin e interesit nga pronat ruse. Në korrik, BE njoftoi ndarjen e 1,5 miliardë eurove ndihmë për Ukrainën, që korrespondon me këstin e parë të këtyre të ardhurave.

Këto fonde pritet të gjenerojnë 2,5 deri në 3 miliardë euro në vit për të ndihmuar në armatimin e Ukrainës dhe financimin e rindërtimit të saj.