Zëvendëskryeministri përgjegjës për politika të qeverisjes së mirë, Arben Fetai, ka reaguar sot ndaj raportit të Transparency International për vitin 2024, në të cilin Maqedonia e Veriut renditet 12 vende më poshtë në Indeksin e Perceptimit të Korrupsionit.

Duke komentuar raportin, Fetai ka shkruar në Facebook se ai “tregon se qeverisja e LSDM-së dhe BDI-së ka qenë e korruptuar dhe jotransparente”.

Ai vlerëson se vlerësimi i dobët në raport “është rezultat i skandaleve gjyqësore në vitin e fundit të qeverisjes së kaluar, duke përmendur ndryshimet skandaloze në Kodin Penal, që mundësoi amnistinë për mbi 200 lëndë penale”.

“Reputacioni i vendit në luftën kundër krimit është dëmtuar edhe më shumë nga skandalet në Këshillin Gjyqësor dhe Akademinë e Gjyqtarëve dhe Prokurorëve, të zgjedhur në kohën e qeverisjes së LSDM-së dhe BDI-së”, shton Fetai.

Sipas tij, qeveria e re po adreson drejt prioritetet e saj strategjike, si reformat në drejtësi dhe lufta kundër krimit të organizuar dhe korrupsionit, zbatimi i të cilave do të sjellë rezultate konkrete.

Në këtë drejtim ai potencon edhe inicimin e shkarkimit të prokurorit publik Ljupço Kocevski dhe interpelancën e anëtarëve të Këshillit Gjyqësor.