Banka Evropiane e Investimeve propozon krijimin e një instrumenti financiar, si ai i pandemisë Covid-19, i cili do të siguronte 100 miliardë euro për rindërtimin e Ukrainës, shkruan Reuters.

Një fond i tillë fillimisht duhet të ketë 20 miliardë euro si kontribut i vendeve anëtare të BE-së, para që do të vendoseshin në formën e fondeve të pakthyeshme, kredive dhe garancive.

Garancitë do të kishin pjesëmarrje shumëpalëshe dhe do të ofroheshin për projekte infrastrukturore me një vlerë totale prej 100 miliardë eurosh, fonde që do të mbulonin gjysmën e nevojave thelbësore të Ukrainës.

Propozimi i BEI duhet të prezantohet sot, gjatë konferencës ndërkombëtare për rimëkëmbjen e Ukrainës, që po mbahet në Zvicër. Qëllimi është të sigurohen fonde për të ndihmuar vendin të rimëkëmbet nga armiqësitë.

Fondet nga ky fond do të përdoren për restaurimin e urave, kanaleve të ujësjellësit dhe veprave të tjera infrastrukturore, veçanërisht në qytetet ku ka një rritje të popullsisë për shkak të migrimit nga qytetet e tjera të vendit të shkatërruar nga lufta.

Për të mundësuar përdorimin e këtyre masave, fillimisht kërkohet miratimi nga Komisioni Evropian dhe më pas edhe shtetet anëtare duhet të shprehin mendimin e tyre për një propozim të tillë.