Samiti i BE-së kushtuar Ukrainës
Presidenti i Këshillit të Bashkimit Evropian, Charles Michel u dërgoi një letër liderëve të vendeve anëtare të BE-së, në të cilën i ftoi ata në Samitin e planifikuar për sot dhe nesër në Bruksel.
Michel informon liderët e BE-së me një letër se tema kryesore e bisedës sot do të jetë Ukraina.
Samiti do të fillojë me një drekë pune me Sekretarin e Përgjithshëm të Kombeve të Bashkuara Antonio Guterres për të diskutuar çështjet kyçe gjeopolitike dhe sfidat globale, pas së cilës presidenti ukrainas Volodymyr Zelensky do t'i bashkohet udhëheqësve përmes video-konferencës.
Michel theksoi se BE, si gjithmonë, do të riafirmojë "angazhimin e saj të palëkundur për të ndihmuar Ukrainën", e cila përfshin vazhdimin e punës për përdorimin e fondeve të ngrira ruse.
- Më e rëndësishmja, që nga takimi ynë i fundit në shkurt, ne kemi punuar për një rritje të menjëhershme të prodhimit dhe dërgimit të municioneve në Ukrainë. Qëllimi ynë është t'i sigurojmë Ukrainës një milion fishekë municionesh në 12 muajt e ardhshëm dhe të sigurojmë financimin e duhur. Për këtë do të duhet të marrim masa për të forcuar kapacitetet prodhuese të industrisë evropiane të mbrojtjes, theksoi Michel.