BE vlerësoi Ramën për draftin e PKSH: Është një dokument serioz dhe cilësor
Në Këshillin Evropian i është dërguar edhe draft teksti për themelimin e komunitetit të komunave me shumicë serbe në Kosovë, të cilin kryeministri shqiptar Edi Rama e ka dorëzuar në Paris dhe Berlin, kanë konfirmuar për Radion Evropa e Lirë burime nga ai institucion.
Burime diplomatike që kanë parë draftin vlerësuan se ai është një “dokument serioz dhe cilësor”.
Burime nga Brukseli i thanë Radios Evropa e Lirë se teksti i draftit është analizuar me kujdes dhe shtuan se po trajtohet si një kontribut tjetër, i ngjashëm me draftet e tjera të bëra nga organizata dhe grupe të ndryshme kërkimore.
Diplomatët në Bashkimin Evropian deklarojnë se nuk është aq e rëndësishme se si e trajton BE-ja draftin, por çfarë qëndrimi kanë Serbia dhe Kosova ndaj tij, transmeton Beta.
“I takon Prishtinës dhe Beogradit që të avancojnë drejt përmbushjes së këtij detyrimi në kuadër të dialogut”, tha një diplomat evropian në kushte anonimiteti.
Kryeministri i Shqipërisë, Edi Rama, bëri të ditur në një konferencë për shtyp se më 7 qershor presidenti francez Emmanuel Macron dhe të kancelarit gjerman Olaf Scholz ka dorëzuar draftin për themelimin e një Bashkësie të komunave me shumicë serbe në Kosovë dhe ka informuar kryetarin e Këshillit Evropian, Charles Michel, dhe palën amerikane.
Rama ka thënë gjithashtu se nuk është konsultuar me kryeministrin e Kosovës, Albin Kurti, për hartimin e statutit për themelimin e ZSO-së.