I dërguari special i SHBA-së për Ballkanin Perëndimor Gabriel Escobar ka thënë sot në Beograd se situata në veri të Kosovës duhet të deeskalohet menjëherë.

Duke iu drejtuar mediave në ambasadën amerikane në Beograd, Escobar tha se SHBA dhe BE shpresojnë për zgjedhje të reja dhe se duan që serbët të marrin pjesë në to.

“Sfida më e madhe për Serbinë është të bindë serbët që të kthehen në institucione. Presidenti Aleksandar Vuçiq tha se do të përdorë ndikimin e tij që serbët të marrin pjesë në zgjedhje”, tha Escobar, i cili së bashku me Lajçak mbrëmë janë takuar me presidentin e Serbisë.

Escobar ka dhënë përgjigje edhe në pyetjen lidhur me Bashkësinë e Komunave Serbe.

“ZSO do të themelohet, por pyetja e vetme është nëse me këtë qeveri të Kosovës apo me një të ardhme, kjo është një kërkesë që qeveria e Kosovës duhet ta përmbushë. Kështu thuhet në Marrëveshjen e Brukselit, në konkluzionet e Këshillit të BE-së dhe në Marrëveshjen e Ohrit”, tha Escobar.