Ministri i Shëndetësisë i Serbisë, Zlatibor Lonçar, pas vizitës së të lënduarve në aksidentin në Bullgari, ka deklaruar se nuk ka viktima, transmeton Beta.

“Kemi vizituar të gjithë fëmijët dhe të rriturit dhe kemi biseduar me ta. Një fëmijë është operuar, si dhe shoferi të cilit i është amputuar këmba”, tha Lonçar për Radio Televizionin Serbi.

Lonçar, i cili me një koleg nga Bullgaria vizitoi të plagosurit në spitalin e qytetit Stara Zagora, tha se ka biseduar me fëmijë dhe të rritur dhe se fëmija i operuar ndihet mirë.

“Një fëmijë ka lëndime në kokë dhe do të transferohet në Sofje për trajtim të mëtutjeshëm, ku me gjasë do të transferohet dhe do të operohet fëmija”, ka theksuar Lonçar.

Ai bëri të ditur se do të organizohet edhe transporti i fëmijëve që janë mirë.

Lonçar falënderoi të gjithë ata që u përfshinë në Bullgari në mënyrë që fëmijët dhe të rriturit nga Serbia të kujdeseshin siç duhet pas aksidentit.