Kryeministri i Japonisë Fumio Kishida si pjesë e vizitës së tij historike në Ukrainë, sot ai vizitoi Bucha, një qytet i vogël jo shumë larg Kievit.

Kishida është kreu i parë i qeverisë japoneze që nga Lufta e Dytë Botërore që viziton një zonë lufte. Toj mbërriti në Bucha me tren herët pasdite, menjëherë pas mbërritjes në Kiev dhe para takimit me presidentin Volodimir Zelenski. Kievi e konsideron si historike ardhjen e tij në vend gjatë luftës. Kishida ishte i vetmi udhëheqës i një vendi të G7 që nuk e kishte vizituar Ukrainën.

“Kjo vizitë historike është një shenjë e solidaritetit dhe bashkëpunimit të fortë midis Ukrainës dhe Japonisë. Ne i jemi mirënjohës Japonisë për mbështetjen dhe kontributin e saj të fortë në fitoren tonë të ardhshme”, shkroi në Facebook zëvendësministrja e Jashtme e Ukrainës, Emine Djepar.

Vizita e kryeministrit japonez përkon me qëndrimin e presidentit kinez Xi Jinping në Moskë.

Në përgjigje të mbërritjes së kryeministrit japonez në Kiev, Ministria ruse e Mbrojtjes tha se dy bombardues strategjikë rusë fluturuan mbi Detin e Japonisë për shtatë orë.

Kishida po takohet me Zelensky për të shprehur "respektin për guximin dhe këmbënguljen e njerëzve që mbrojnë atdheun e tyre nën komandën e tij, si dhe mbështetjen dhe solidaritetin e palëkundur të Japonisë dhe grupit G7".

Japonia po pret gjithashtu samitin e G7 në Hiroshima në maj. Vendi vazhdon të mbështesë Ukrainën dhe të vendosë sanksione ndaj Rusisë, por nuk dërgon ndihmë ushtarake sepse kushtetuta pacifiste e Japonisë kufizon aftësitë ushtarake të vendit vetëm për vetëmbrojtje.