Maqedonasit etnikë nga Pusteci dhe Shqipëria sot në fshatin Globoçan të Prespës së Madhe për herë të parë organizuan festë me rastin e 24 majit - Ditës së arsimtarëve sllavë, vëllezërve të shenjtë Kiril dhe Metodi.

Në bashkëorganizim të Shoqatës Maqedonase "Sonce" nga Shqipëria, Universitetit "Fan Noli" nga Korça, Shqipëri dhe Shoqatës për Letërsi dhe Kulturë "Mackovo" nga Ohri, u mbajt një tubim shkencor.

Të pranishmit në tubim i përshëndeti Vasil Sterjoski, deputeti i parë maqedonas në Kuvendin e Shqipërisë dhe kryetar i partisë politike të maqedonasve - MAEI.

Para monumentit të shkrimtarit Sterjo Spase dhe në Muzeun Përkujtimor “Sterjo Spase” u zhvilluan disa promovime librash dhe lexime poezish.

Aktiviteti qendror ishte promovimi i veprës kapitale “Integrimi harmonik i minoritetit maqedonas në Republikën e Shqipërisë - Rasti i minoritetit maqedonas në zonën e Prespës dhe Vrbnikut” nga prof. Dr. Maria Deutsche, një intelektuale e shquar shqiptare. Studimi fokusohet në ndikimet e ndërsjella social-kulturore ndërmjet shqiptarëve dhe pjesëtarëve të komunitetit maqedonas në rajonin e Korçës.

- Banorët e komunitetit maqedonas sjellin vlera kulturore si toleranca, mirëkuptimi, bashkëpunimi, arsimimi, atdhedashuria, të cilat i ndihmuan këta banorë të jetojnë me sukses me dinjitet mes dy kulturave. Në këtë bashkëjetesë vihet re këmbëngulja në ruajtjen e koherencës së shoqërisë etnike, ku në çdo situatë social-kulturore kjo etni shfaqet homogjene dhe me konture të qarta identitare dhe kulturore, shkruan ndër të tjera Maria Deutsche.

Gjithashtu u prezantua vepra letrare e shkrimtarit Vasil Shumka me prejardhje nga fshati Dolna Goricë i Komunës së Pustecit, ndërsa në katërvjetorin e vdekjes së tij u shënua kujtimi për jetën dhe veprën e Spase Mazenkovskit. Për veprën e Mazenkovskit foli profesoresha Katerina Todorovska nga Instituti i Historisë Kombëtare në Shkup, e cila theksoi se Mazenkovski është poet, shkrimtar, gazetar dhe publicist i njohur nga fshati Leskë, i cili ka redaktuar gazetën "Mala Prespa".

I ftuar special në festën e 24 majit ishte poeti kroat dhe maqedonas Valerio Orliç, i cili lexoi vargjet e tij përpara monumentit të Sterjo Spases. Me këtë rast nga Tirana në Pustec kanë mbërritur dhe kanë folur ambasadori kroat në Shqipëri, Zlatko Kramariq dhe ambasadori i Maqedonisë së Veriut, Danço Markovski.

Poeti kroat Orliç është në një turne të madh letrar në Kroaci, Maqedoninë veriore dhe Shqipëri. Nga data 28 maj do të marrë pjesë në festivalin e famshëm të poezisë në Korçë – “Mbrëmjet e Poezisë”. Ai është themelues dhe kryetar nderi i Shoqatës Letrare Kroate.

Burimi: MIA