Shefi ekzekutiv i organizatës islamike të biznesit Global Ikhwan Services and Business (GISB), e cila drejton shtëpi bamirësie në Malajzi, ku dyshohet se fëmijët janë abuzuar, Nasiruddin Ali, konfirmoi se kishte pasur "një ose dy" raste të sodomisë në shtëpi. por mohoi akuzat e tjera për sjellje të pahijshme dhe abuzim seksual të fëmijëve.

Ali tha se pretendimet e policisë se fëmijët u sodomizuan ishin "të neveritshme", por pranoi se kishte raste të abuzimeve të tilla në shtëpi, raporton Reuters.

Policia këtë javë shpëtoi më shumë se 400 fëmijë të dyshuar si viktima të abuzimit seksual në shtëpitë bamirëse të drejtuara nga GISB.

Ekzaminimet mjekësore treguan se shumë fëmijë kanë lëndime në përputhje me abuzim fizik dhe seksual, dhe 13 prej tyre u sodomizuan, tha policia të premten.

Inspektori Razarudin Hussain tha se policia arrestoi 171 të rritur, duke përfshirë "ustazis", ose mësues fetarë islamikë, gjatë bastisjeve të koordinuara në 20 objekte në dy shtete të Malajzisë të mërkurën, raporton Reuters.

Në mesin e të shpëtuarve janë 201 djem dhe 201 vajza, të moshës nga një deri në 17 vjeç, pas raporteve për neglizhencë, abuzim, ngacmim seksual dhe abuzim të supozuar që u paraqitën këtë muaj, tha Razarudin në një konferencë për shtyp.

Ai nuk zbuloi se kush ishte autori i atyre raporteve, por tregoi se të gjitha shtëpitë e fëmijëve menaxhohen nga GISB, e cila deklaroi se nuk menaxhon shtëpi bamirësie.

GISB është e lidhur me sektin fetar Al-Arqam me bazë në Malajzi, i cili u ndalua nga qeveria në 1994.

Kompania e pranoi lidhjen, por e karakterizoi veten si një konglomerat islamik i bazuar në praktikat myslimane.