Ministri i Jashtëm serb Ivica Daçiç ka vlerësuar se situata në Kosovë është “pasojë e përshkallëzimit të vazhdueshëm të kryeministrit të Kosovës, Albin Kurti”, si dhe “deeskalimit për të cilin po punon një pjesë e bashkësisë ndërkombëtare”.

“Rezultati i kësaj është një plan tinëzar, që është që Kurti lejohet të bëjë diçka, bashkësia ndërkombëtare si reagon diçka... Të gjithë tani po reagojnë kundër Prishtinës për atë që kanë bërë, përfshirë edhe KFOR-in. Roli i Kfor-it nuk është të protestojë, por ta bëjë të pamundur atë veprim të njëanshëm”, tha Daçiç për RTS.

Sipas tij, KFOR-i sot i mbron kryetarët e sapozgjedhur nga “pronarët” e objekteve komunale – serbët që janë të punësuar atje.

Duke komentuar paralajmërimet dhe dënimet e bashkësisë ndërkombëtare për atë akt të njëanshëm të autoriteteve në Prishtinë, Daçiq tha se “nuk jetohet në terren nga paralajmërimet”.

“Nëse Amerika nuk mund ta bëjë Prishtinën ta respektojë këtë, atëherë me të vërtetë nuk e di se çfarë besimi mund të kemi te komuniteti ndërkombëtar dhe te patronët e atij aventurizmi të rrezikshëm ushtarak në Prishtinë”, tha Daçiq.

Ai ka deklaruar se forcat e ushtrisë serbe janë në gatishmëri dhe se Serbia do t'i mbrojë serbët e Kosovës nëse është e nevojshme.

“Ne sigurisht që nuk do të lejojmë viktima serbe për shkak të mosgatishmërisë së bashkësisë ndërkombëtare apo për shkak të aventurizmit ushtarak të Kurtit”, tha Daçiq.

Të premten, pas përpjekjeve të qytetarëve nga veriu i Kosovës për të penguar policinë që të hyjë në objektet komunale në Zveçan, Zubin Potok dhe Leposaviq, ka pasur përleshje, në të cilat policia ka përdorur gaz lotsjellës, tym dhe bomba shokuese.

Disa serbë u plagosën, ndërsa policia e Kosovës hyri në ndërtesat komunale dhe solli kryetarët shqiptarë të komunave, të cilët fituan zgjedhjet e fundit të mbajtura, në të cilat dolën gjithsej 3,4 për qind e votuesve.

Zgjedhjet, të cilat u bojkotuan nga përfaqësuesit politikë serbë të Kosovës, u organizuan nga Prishtina në fund të prillit pasi serbët u larguan nga institucionet e Kosovës nëntorin e kaluar.

VIDEO: Në veriun e tensionuar të Kosovës, policia përdori gaz lotsjellës për të shpërndarë qytetarët