Presidenca çeke e BE-së do të përgatisë një “paketë Krishtlindjesh” me propozime për reformën e Unionit, për të tërhequr ata anëtarë që nuk janë të bindur për nevojën e reformave.

"Mbetet e paqartë se cili do të jetë fati i paketës," tha ministri çek i Çështjeve Evropiane Mikulas Beck, duke shtuar se vendi i tij ka të ngjarë të këmbëngulë për fleksibilitet në procesin e zgjerimit.

Kjo do t'i mundësojë "Ukrainës, për shembull, të hyjë në tregun e përbashkët", tha ministri çek, i cili theksoi se "për qeverinë çeke, forcimi gjeopolitik i Ukrainës është çështje e sigurisë kombëtare".

Presidenca çeke e BE-së erdhi me idenë e përgatitjes së një “pakete të Krishtlindjeve” pas marrjes së rezultateve të pyetësorit që iu dërgua vendeve anëtare gjatë verës.

“Rezultatet tregojnë se qeveritë kombëtare aktualisht nuk janë shumë të hapura për çështjen e reformave të Unionit. Vendet skandinave, për shembull, nuk janë të prirura për të hapur Traktatin e BE-së”, tha ministri çek, i cili vlerësoi se paketa është “e vetmja rrugë përpara”.

Presidentja e Komisionit Evropian Ursula von der Leyen në fillim të këtij muaji në fjalimin e saj për gjendjen e Bashkimit mbështeti konventën kushtetuese për reformimin e Traktatit të BE-së, duke theksuar nevojën që liderët të jenë "seriozë" për reformat e BE-së.

Konventa e mbrojtur nga von der Leyen nënkupton mbledhjen e përfaqësuesve të 27 qeverive kombëtare dhe përfaqëson një hap përpara në proces, por nuk është një garanci se do të ketë një reformë të Traktatit të BE-së.