Presidenti bullgar Radev viziton Gjermaninë
Presidenti i Bullgarisë Rumen Radev sot niset për në Republikën Federale të Gjermanisë me ftesë të mikpritësit të tij, presidentit Frank-Walter Steinmeier, njoftoi shërbimi për shtyp i presidentit bullgar.
Sipas korrespondentit të MIA-s nga Sofja, të hënën, presidenti Radev do të ketë një takim “tete-a-tete” me homologun e tij gjerman në Pallatin Bellevue në Berlin.
Pas takimit ai do të bisedojë me kancelarin gjerman Olaf Scholz dhe kryetaren e bashkisë së Berlinit, Franciska Gifai.
Bisedimet pritet të fokusohen në marrëdhëniet dypalëshe, thellimin e bashkëpunimit ekonomik dhe investues, si dhe tema në axhendën e Bashkimit Evropian, diversifikimin e furnizimeve me energji dhe forcimin e sigurisë së Evropës në kontekstin e luftës në Ukrainë.
Radev do të marrë pjesë edhe në Forumin e Biznesit Gjermano-Bullgar të organizuar nga Oda Gjermane e Industrisë dhe Tregtisë që do të mbahet në Shtëpinë e Industrisë Gjermane në Berlin.
Kreu i shtetit bullgar do të takohet me kryeministrin e provincës së Hamburgut dhe kryetarin e bashkisë Peter Cencher më 17 maj në Hamburg. Ai do të takohet edhe me kryesinë e Odës Ekonomike të Hamburgut, si dhe do të vizitojë kompaninë "Aurubis AG", e cila zhvillon aktivitet ekonomik aktiv në Bullgari.