Bullgari: Refugjatët ukrainas duhet të largohen nga hotelet, nisin pushimet verore

Foto: EPA-EFE / VASSIL DONEV

Dhjetëra mijëra refugjatë ukrainas që qëndrojnë në vendpushimet bullgare të Detit të Zi do të duhet të largohen deri më 1 qershor për shkak të reduktimit të subvencioneve të qeverisë dhe fillimit të sezonit të pushimeve verore.

Pasi Rusia pushtoi më 24 shkurt dhe ukrainasit filluan të largoheshin nga vendi, Bullgaria, si shumë vende të tjera në Evropën Qendrore dhe Lindore, vendosi të ndihmojë, të pranojë dhe të sigurojë strehim.

Nga 97.000 refugjatët ukrainas aktualisht në Bullgari, rreth 60.000, kryesisht gra dhe fëmijë, janë të strehuar në resorte dhe shteti bullgar u siguron atyre 40 leva (22 dollarë) për person në ditë.

Sipas mediave bullgare, zhvendosja masive e refugjatëve ukrainas nga hotelet e tyre do të fillojë të dielën.

Më shumë se 20.000 njerëz do të strehohen në bazat shtetërore në vend. Kjo është bërë e ditur nga administrata e qarkut në Varna. Refugjatët do të transportohen me trena të organizuar. Në zonat e populluara ku nuk ka stacione treni, ukrainasit do të transportohen me autobusë ushtarakë dhe privatë.

Më shumë se 60.000 refugjatë ukrainas po qëndrojnë aktualisht në hotele në Bullgari. Gati 20.000 prej tyre vendosën të largohen nga Bullgaria në ditët në vijim, njoftuan mediat lokale.

Video e ditës