Kryeministrja britanike Liz Truss mbrojti sot planin e saj ekonomik, i cili ka tronditur tregjet financiare, duke thënë se ajo është e përgatitur të ndërmarrë hapa "të diskutueshëm" për të rindezur rritjen ekonomike dhe nuk do të ndryshojë kurs pavarësisht trazirave.

Kur u pyet nëse do të ndryshonte mini-buxhetin që tronditi tregjet me uljen e taksave dhe paratë që qeveria do të marrë hua, Truss tha: "Unë nuk e pranoj premisën e kësaj pyetjeje".

- Po përballemi me kohë të vështira ekonomike. Unë nuk e mohoj këtë. Është një problem global. Por qeveria britanike hyri absolutisht dhe bëri gjënë e duhur në këto kohë të vështira, tha Truss në një intervistë me stacionet lokale të radios BBC.

Kancelari britanik i Thesarit Kwasi Kwarteng dërgoi valë tronditëse nëpër tregjet financiare javën e kaluar duke zbuluar një plan për të ulur taksat pa shpjeguar ndikimin në financat publike ose se si qeveria do të reformonte ekonominë për të nxitur rritjen.

Si rezultat, vlera e paundit ra, yield-et e bonove britanike u rritën, duke detyruar Bankën e Anglisë dje të ringjallë programin e saj të blerjes së bonove për të mbështetur fondet e pensioneve.

Truss tha se qeveria duhet të ndërmarrë veprime të menjëhershme dhe vendimtare për të mbrojtur familjet dhe bizneset nga rritja e faturave të energjisë.

– Sigurisht, kjo nënkupton marrjen e vendimeve të diskutueshme dhe të vështira. Por unë jam gati për këtë si kryeministër sepse është e rëndësishme për mua që të inicioj ekonominë tonë, tha Tras.