Qeveria britanike njoftoi sot se do të ndajë 75 milionë paund (afërsisht 89 milionë euro) për të luftuar bandat e trafikimit të emigrantëve, raportojnë mediat franceze. Këto fonde fillimisht kishin për qëllim financimin e marrëveshjes së migracionit të lidhur me Ruandën, e cila përfundimisht u shemb.

Kryeministri laburist Keir Starmer, i cili erdhi në pushtet në korrik, ka hedhur poshtë një plan të diskutueshëm, të mbështetur nga konservatorët në pushtet, i cili do të bënte që azilkërkuesit që kanë mbërritur ilegalisht në Mbretërinë e Bashkuar të deportohen në vendin e Afrikës Lindore.

Ndërkohë Starmer u zotua të godasë "bandat" e përfshira në organizimin e kalimit vdekjeprurës të Kanalit anglez.

- Financimi i shpallur do të përdoret për blerjen e kamerave të vëzhgimit dhe pajisjeve teknologjike për të lehtësuar mbledhjen e provave për ndjekjen penale të trafikantëve të qenieve njerëzore, tha Sekretarja e Brendshme britanike, Yvette Cooper. Fondet do të përdoren gjithashtu për të punësuar roje kufitare dhe 100 hetues specialistë për Agjencinë Kombëtare të Krimit.

Qeveria britanike dëshiron ta trajtojë problemin në bashkëpunim me partnerët e saj evropianë.