Zyrtarët amerikanë kanë thënë se nuk kanë informacion për të konfirmuar raportet e mediave se Rusia po përgatitet të përdorë armë taktike bërthamore në ose afër fushëbetejës në Ukrainë. Laura Cooper, zëvendësndihmës sekretarja e mbrojtjes, tha se kishte parë vetëm "raporte me burim të hapur" që sugjeronin se Rusia mund të lëvizë armët taktike bërthamore me hekurudhë. Ajo shtoi se ushtria amerikane nuk ka parë asgjë për të ndryshuar qëndrimin e saj bërthamor.

Zëdhënësja e Shtëpisë së Bardhë, Karine Jean-Pierre, e pyetur në lidhje me raportet, tha se Shtetet e Bashkuara nuk shohin asnjë arsye për të rregulluar qëndrimin e tyre strategjik bërthamor, "as nuk kemi ndonjë indikacion që Rusia po përgatitet të përdorë menjëherë armë bërthamore".

"Presidenti rus Vladimir Putin e ka përshkallëzuar luftën në Ukrainë duke urdhëruar një mobilizim të pjesshëm ushtarak, duke shtyrë aneksimin e paligjshëm të katër rajoneve të Ukrainës dhe duke u zotuar të mbrojë territorin rus "me çdo mjet në dispozicionin tonë", duke përfshirë armët bërthamore."

Komentet e zyrtarëve erdhën pasi gazeta The Times raportoi më 3 tetor se Putini do të kryente një provë bërthamore në kufirin me Ukrainën. Gazeta londineze raportoi se NATO kishte paralajmëruar anëtarët e saj për testin.