Presidenti i Shteteve të Bashkuara, Joe Biden sot do t'u bëjë thirrje amerikanëve "të mos përdorin urrejtje" dhe Kongresit të miratojë masat e kontrollit të armëve. Ai dhe zonja e parë Jill Biden, sot në Buffalo të Nju Jorkut, do të nderohet viktimat e masakrës së së shtunës.

Ata do të vizitojnë vendin e tragjedisë dhe do të dërgojnë ngushëllime për të afërmit e viktimave të të shtënave masive, si dhe do të takohen me përfaqësues të shërbimeve të sigurisë dhe emergjencave, si dhe me krerët lokalë.

“Presidenti do ta quajë këtë akt të urryer siç është – terrorizëm i bazuar në urrejtje dhe një ideologji të çoroditur që copëton shpirtin e vendit tonë”, tha sot një zyrtar i Shtëpisë së Bardhë.

Biden do t'i kërkojë Kongresit "të ndërmarrë hapa për të hequr armët nga rrugët tona dhe për të parandaluar që ato të bien në duart e kriminelëve dhe njerëzve me sëmundje të rënda mendore që i bëjnë ata të rrezikshëm për veten dhe të tjerët".

Ajo që dihet është se 18-vjeçari Peyton Hendron, një burrë i bardhë, të shtunën në një supermarket, që ndodhet në një pjesë të qytetit ku jetojnë kryesisht afrikano-amerikanë, vrau dhjetë persona dhe plagosi tre të tjerë. Nga trembëdhjetë, njëmbëdhjetë janë me ngjyrë.