Presidenti Amerikan Joe Biden sot i bëri thirrje Rusisë të lirojë gazetarin e “Wall Street Journal”, i cili u arrestua me akuzën e spiunazhit dhe ndodhet në paraburgim në Moskë në pritje të gjykimit.

“Lironi gazetarin”, tha Biden teksa u përgjigjej pyetjeve të gazetarëve në Shtëpinë e Bardhë.

Wall Street Journal ka bërë thirrje që ambasadori rus në Uashington të shpallet persona non grata pasi një gazetar i gazetës u arrestua në Rusi nën dyshimin për spiunazh.

“Dëbimi i ambasadorit rus në SHBA, si dhe i gazetarëve rusë që punojnë atje, do të ishte gjëja më e vogël. Momenti i zgjedhur për arrestimin duket si një provokim i llogaritur për të vënë në siklet Shtetet e Bashkuara dhe për të frikësuar gazetarët e huaj që ende punojnë në Rusi”, pohoi gazeta në editorialin e saj të botuar mbrëmë.

Evan Gershkovich (31) u arrestua në Yekaterinburg nën dyshimin për spiunazh. Kremlini pretendon se ai u kap "në vendin e krimit". Gazetari mohoi të gjitha akuzat e paraqitura para gjykatës së Moskës. Megjithatë, atij i është caktuar masa e paraburgimit deri më 29 maj, ndërsa paraburgimi mund të zgjatet deri në gjykim.

E vetmja gjë që dihet është se Shërbimi Federal i Sigurisë së Rusisë njoftoi se kishte "parandaluar veprimtarinë e paligjshme" duke arrestuar Gershkovich.

Përndryshe Marija Zakharova, një zëdhënëse e Ministrisë së Jashtme ruse, kritikoi kryediplomatin e BE-së, Josep Borrell, në Telegram për komentet e tij në lidhje me gazetarin e arrestuar të Wall Street Journal, Evan Gershkovich.

Borrell tha se BE dënon ndalimin e gazetarëve dhe qytetarëve amerikanë dhe se gazetarët duhet të jenë në gjendje të ushtrojnë lirisht profesionin e tyre. Zakharova komentoi për këtë: "Qëndroni pas fjalëve tuaja, Josep, ngrihuni për Julian Assange dhe Marat Kassem". "Vetëm për ekuilibër."

BE-ja kritikon Moskën për "mosrespektimin e medias"